أجمل ما في الخطوبة العزومات الرومانسية.. على أحلى محلات أكل في البلد.. واللي عمرك مانتي شايفاها بعد الجواز.. المهم نصائحي لك عند أي عزومة مع ختيبك…..
طبعا الرقة لازم الرقة وحياة النبي ….
1- الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولا من البوز زي الخنجر ولا من فوق طبعًااا إيه ؟؟2- العيش أوعي تفضحينا وتقطعيه بسنانك….. ولا الرغيف نصين بإيديك وكل نص لقمة وتحشري.. أوعي.. العيش بيتقطع بالسكينة في الطبق.. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جدااا
وبعدين لما تروَّحي.. إبقي حِفِّي زي مانتِ عايزه….
3- الشوووربة.. أبوس كعب رجلك.. بند الشوربة ده مهم جدًاااا.. الشوربة تتشرب من غير صوت خالص.. ومن غير ماتقعدي تنفخي فيها.. زي القهوجي اللي بينفخ في الحجر يعنى بلاش تفكريني ب (موزة القهوجى). وطبعًاااااا عايزك تنسى تمامًا.. السلطانية اللي بتقيميها على بقك في البيت.. وتدلدقي على روحك..
بالمعلقه وبدون صوت… سخنة ولعة برضه بدون صوت.. وتسيبي تلت الطبق ع الأقل… مش تميليه…. عشان تلهطيها لآخر نقطة……
4- الرز طبعاً .. بيتاكل بالشوكة.. أوعي إيدك تتمد ع المعلقة.. وتغرفي من طبق الرز وتعبي.. إوعي.. الرز بالشوكة.. وكأنك بتبوسيه مش بتاكليه…
5- المكرونة.. الاسباكتي.. برضه بالشوكة.. تتلف على طرف الشوكة.. لحد ما تخلص وبعدين تحطيها ف بؤك من سكات.. مش تشفطي المكرونة عود عود..
6- السمك.. مشكلة.. (شوفي هقولك برضو عشان الفضايح)…
بتفصلي اللحم عن الشوك…. إزاي..؟؟ تقطعي اللحم من النص…. بالطول وبعدين تفردي اللحم ع الجانبين ولما تخلصي ناحية.. متقلبيش السمكة…. بلاش فلح… شيلي السلسله بالشوكة والسكينة , وحطيها ف جنب الطبق وكملي أكل النص التاني… وبدل الفيلم الهندي ده.. نصيحة.. ماتكليش السمك خالص.. قولي مابحبش السمك وخلصي نفسك… (ولما تروحي بالسلامة ومن غير فضايح هبقى أبعتلك السمك اللي انتي عايزاه)
7- الجمبري.. -إذا كنتي عارفاه-(اللي هو البرتقالي ده) أول ماطبق الجمبري
ينزل… ( أبوس إيد عيلتك نفر نفر , أوعى تزغرتى من الفرح) لكن بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت بابااااا.. وأتنهدي جامد وقولي.. برضه..؟؟؟
وتروحي قاطعة راس الجمبريياية.. بالشوكة.. أنا ف عرضك
إنسي المصمصة دلوقت..
8- البطاطس سواء مسلوقة أو محمرة… أوعي تهرسيها وتدبيها ع الرز وتبدي ….لا..لآ…لآ… وحياة أمك , بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي….
9- الفاكهة.. لو الفاكهة فيها بذر.. طلعيه من بؤك بالراحة وحطيه ف إيدك وهي مقفولة.. وبعدين ف طفاية السجاير اللي ع الترابيزه.. أوعي ياحبيبتي من نظام التفتفة للبذر (وتخديلك هدف وتقعدى تنشنى فيه ببقك).. إنسي….
10- ولما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-.. وتقولي له مش ممكن.. أنا عمري ما اتفجعت كدة.. أنا أودامي أسبوع.. هابطل أكل فيه…..
وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها…. آل يعني بتمسحي بؤك الصغنون ..
وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك..
لفة الفول والطعمية اللي جايباها معاكي بس بلاش بصل المرة دى ........ وبالهنا والشفااااااااااااا .
و أى خدمة
ملحوظة : النصايح دى عشان ربنا يسهلها للبنات عشان عمايلهم اللي بيعملوها فينا دي
م/ كريم حميدان
